Қазақстан мен Иран сауда-экономикалық ынтымақтастықты кеңейту мәселелерін талқылады
ҚР Премьер-Министрінің орынбасары – Сауда және интеграция министрі Бақыт Сұлтанов жұмыс сапарымен Тегеранға барды. Б. Сұлтанов бастаған қазақстандық делегация Иран Ислам республикасының басшылығымен сауда-экономикалық ынтымақтастықты кеңейту және екі ел арасындағы транзиттік әлеуетті жандандыру мәселелері бойынша келіссөздер жүргізді.
Сауда, ауыл шаруашылығы, денсаулық сақтау, мұнай, көлік және қаланы дамыту министрліктерінің басшыларымен, сондай-ақ темір жол әкімшілігінің, Ұлттық банктің, ұлттық мұнай компаниясының басшылығымен, Сауда-өнеркәсіп палатасының және елдің кейбір провинцияларының өкілдерімен кездесулер өтті.
ИИР-дің бірінші Вице-президенті Мохаммад Мохбермен келіссөздер барысында қазақстандық тарап Иран аумағы арқылы «Солтүстік-Оңтүстік» бағыты бойынша, кейіннен Парсы шығанағы, Африка, Оңтүстік Азия елдеріне және басқа да өңірлерге, оның ішінде мультимодальдық жүк тасымалдарын пайдалана отырып, жүктерді тасымалдауды ұлғайтуға мүдделілігін растады. Қазақстан-Иран көлік ынтымақтастығын кеңейтудің маңыздылығы туралы айта келе, Иран тарапы көлік-логистикалық ынтымақтастықты дамыту жөніндегі келіссөздердің жемісті сипатын атап өтті. Бұл ретте бірінші М. Мохбер осы мақсаттарға қол жеткізу Иран мен Қазақстанды маңызды өңірлік хабқа айналдыра алатынын атап өтті.
Екі тарап та соңғы жылдары тауар айналымы өсімінің жақсы серпіні байқалып отырғанын атап өтті. Сонымен бірге, қазіргі халықаралық шектеулер кезінде де Иранмен саудадағы әлеует айтарлықтай болып қала береді. Мысалы, тамақ өнеркәсібінде Қазақстан астық, кондитерлік және ұн өнімдерінің, ет және ет өнімдерінің, сондай-ақ жануарлардан алынатын басқа да өнімдердің экспортын ұлғайтуға дайын. Бұл ретте республикада Иран жеміс-көкөніс өніміне сұраныс бар.
Сондай-ақ, тараптар өнеркәсіптік кооперация саласындағы ынтымақтастықты кеңейту мәселелерін талқылады. Ауыл шаруашылығы өнімдерін қайта өңдеу саласында бірлескен жобаларды іске асыру үшін үлкен мүмкіндіктер бар екені атап өтілді, мысалы, ауыл шаруашылығы шикізатын қайта өңдеу бойынша жобалар.
Ирандық инвесторлардың қатысуымен Қазақстан аумағында ет комбинатын салу, майлы дақылдарды қайта өңдеу және астық жинау комбайндарын құрастыру бойынша және т. б. жобалар сәтті жүзеге асырылды.
Иран тарапы сауда миссияларымен, өнімдер мен жетістіктер көрмелерімен алмасу екі елдің жеке секторы мен кәсіпкерлері арасындағы ынтымақтастықты кеңейтуге ынталандыру болатынын атап өтті.