Қасым-Жомарт Тоқаев Еуропалық қайта құру және даму банкінің президенті Одиль Рено-Бассомен кездесу өткізді
Мемлекет басшысы бейнеконференция байланысы режимінде Еуропалық қайта құру және даму банкінің президенті Одиль Рено-Бассомен кездесу өткізді.
Кездесу барысында Қазақстанда транзиттік тасымалдау, экономиканы көміртексіздендіру, қаржы секторы саласындағы бірқатар инвестициялық жобаларды іске асыру перспективалары талқыланды.
Қасым-Жомарт Тоқаев ЕҚДБ-мен ұзақ мерзімді өзара тиімді ынтымақтастықтың оң динамикасын қанағаттанушылықпен атап өтті.
– Біздің өзара іс-қимылымыздың шеңберінде жақсы нәтижелерге қол жеткіздік. Қазақстан Үкіметі мен ЕҚДБ арасындағы тиімді ынтымақтастық одан әрі дамитынына сенімдімін, - деді Мемлекет басшысы.
Одиль Рено-Бассо 16 наурызда Қазақстан халқына Жолдауында баяндалған Қасым-Жомарт Тоқаевтың басшылығымен жүргізіліп жатқан реформаларды құптады.
ЕҚДБ басшысы сондай-ақ көміртегі бейтараптығына қол жеткізу бойынша Қазақстан мәлімдеген мақсат шеңберінде ынтымақтастықты дамытуға дайын екенін растады.
Соңында Қасым-Жомарт Тоқаев Одиль Рено-Бассоны Қазақстанға кезекті сапармен келуге шақырды.