Қазақстан Республикасында инвесторлар үшін тиімді салықтық преференциялар қабылданды
Қазақстанда инвесторлар үшін тиімді салықтық преференциялар қабылданды. Енді біздің экономикамызды дамытуға 10 жылға ақша салуға дайын адамдар корпоративтік, табыс және жер салықтарынан, сондай-ақ мүлік салығы мен ҚҚС-тан босатылады. Инвестордың жұмыс орны, салынған қаражаттың көлемі мен мерзімі ескеріледі,- деп хабарлайды «Хабар 24».
Сенаторлардың айтуынша, мұндай жаңалық жаңа өндірістер ашуға мүмкіндік береді. Инвесторлар стратегиялық инвестициялық келісімді Үкіметпен жасайтын болады. Айта кететін жағдай, құжат жер қойнауын пайдаланушылар мен акцизделетін тауарларды өндірушілерге қатысты емес. Инвестициялық келісімдер мерзімінен бұрын тоқтатылған жағдайда преференциялар жойылады.
Бұл жаңалықты ұялы байланыс операторлары үшін де енгізу ұсынылады. Ол ауылдарда нашар интернет мәселесін шешуге көмектесуі тиіс. Радиожиіліктерді пайдалану үшін жылдық мөлшерлемені 90 пайызға төмендету көзделген. Бірақ үнемделген ақшаны кәсіпкерлер елді мекендерді сапалы кең жолақты интернетпен жабдықтауға жұмсауы тиіс. Жыл соңына дейін 4 мыңнан астам қазақстандық ауылдардың тұрғындары бүкіләлемдік ғаламторға қол жеткізе алуы тиіс.