Халықаралық инвесторлар Шығыс Қазақстан облысында ет өңдеу кешенін салады
Шығыс Қазақстан облысында "KAZAKH INVEST" ҰК" АҚ қолдауымен ет өңдеу кешенін салу жоспарлануда. Жобаның бастамашысы FinSight Ventures инвестициялық қоры мен Brown & Co ағылшын компаниясының қолдауымен "Eco Meat Vostok Ltd" компаниясы болып табылады.
Кешеннің құрылысы қуаттылығы жылына 184 мың тонна құрама жем зауытын, қуаты жылына 20 мың бас селекциялық-генетикалық ферманы, қуаты жылына 39 мың тонна ет союға арналған кәсіпорынды, қуаты жылына 400 мың бас 3 тауарлық ферманы қамтитын болады. 2024 жылға дейін кезең-кезеңімен қаржыландыру кезінде жобаның жалпы құны 117 млрд.теңгені құрайды.
"Кешен роботтандырылған өндіріс қарастырылған ең заманауи технологиялар бойынша жұмыс істейтін болады. Барлық асыл тұқымды мал Даниядан әкелінеді. Өсіру толығымен жабық кешенде жүзеге асырылады, бұл малдың үй және жабайы жануарлармен байланысын мүлдем жоққа шығарады", - деп атап өтті "KAZAKH INVEST" ҰК" АҚ Шығыс Қазақстан облысы бойынша өңірлік директоры Нартай Бейсеков.
Инвесторлар атап өткендей, бұл өндіріс толығымен қалдықсыз болады деп жоспарлануда. Қалдықтарды органикалық тыңайтқыштарға одан әрі қайта өңдеу бойынша цех салу жоспарлануда, олар жергілікті ауыл шаруашылығы тауарын өндірушілерге тегін негізде ұсынылатын болады.
Сондай-ақ кәсіпорында 2000-ға жуық жаңа жұмыс орнын құру көзделуде. Кадрларды іріктеу және орналастыру, бірінші кезекте, жергілікті халық есебінен жүзеге асырылатын болады. Қажетті жоғары білікті мамандарды алу үшін кадрларды оқыту және қайта даярлау жоспарланып отыр.
Жоба Қытай мен Оңтүстік-Шығыс Азия елдеріне өнім жеткізуге бағытталған. Айта кету керек, Шығыс Қазақстан облысының аумағында жаңа жоба нысандарын орналастыру Қытайдағы соңғы тұтынушыларға өнімді жеткізу кезінде логистикалық шығындарды айтарлықтай қысқартады.
Анықтама: FinSight Ventures - 2012 жылы екі серіктес - Алексей Гарюнов пен Виктор Ремшей құрған венчурлық қор. Қаржы секторының технологиялық компанияларына халықаралық инвестицияларға маманданған.
Brown & Co - ауыл шаруашылығы саласындағы консалтингтік қызметтердің жетекші жеткізушісі. Ауыл, коммерциялық және тұрғын үй жылжымайтын мүлік, ауыл шаруашылығы және қоршаған ортаның барлық спектрі бойынша агенттік, кәсіби және консультациялық қызметтердің жетекші жеткізушісі болып табылады.