Қазақстан Республикасында шетелдік капитал тартудың жаңа тұжырымдамасы әзірленуде
ҚР Премьер-министрі Асқар Маминнің төрағалығымен өткен Инвестициялық ахуалды жақсарту жөніндегі кеңестің (ИАЖК) отырысында пандемиядан кейінгі кезеңде Қазақстан экономикасын қалпына келтіру мәселелері талқыланды. Бұл туралы үкімет басшысының баспасөз қызметі хабарлады.
«Үкімет қабылдаған дағдарысқа қарсы шаралар пандемия салдарынан болған экономикалық құлдырауды реттеуге мүмкіндік берді – экономиканың нақты секторында, атап айтқанда, құрылыста (10,5%), ауыл шаруашылығында (5%) және өңдеу өнеркәсібінде (3,3%) оң динамика сақталды»,- деді Асқар Мамин.
Ол Еуропалық Қайта Құру және даму банкін, Азия даму банкін, Халықаралық валюта қорын, сондай-ақ Moody's, Fitch, Standard&Poor's рейтингтік агенттіктерін қоса алғанда, жетекші халықаралық қаржы институттары Қазақстан экономикасының дамуының оң болжамдарын растағанын атап өтті. Премьер-министр жаңа пандемиядан кейінгі нақты ахуал жағдайында экономиканың одан әрі өсуін қамтамасыз ету және оның сапалы әрі тұрақты дамуын қалыптастыру үшін Қазақстанның 2025 жылға дейінгі Стратегиялық даму жоспары әзірленгенін атап өтті. Сонымен қатар, үкімет шетелдік капиталды тартудың жаңа тұжырымдамасын іске асыруда.
«Бұл жұмыстың принциптерінің бірі жобаларды дайындау мен іске асырудың әрбір сатысында инвесторларға таргеттелген көзқарас болмақ», — деді Асқар Мамин.
Үкімет басшысы әрбір стратегиялық инвестор үшін сараланған қолдау «пакеттерін» қамтамасыз ететін арнайы инвестициялық келісімдерге қол қойылатынын атап өтті. «Инвестицияларды тарту біздің жаңа экономикалық моделіміздің негізгі аспектісі болып табылады. Біз Қазақстанның халықаралық ұстанымын сенімді және болжамды инвестициялық бағыт ретінде одан әрі нығайту жөніндегі ұсынымдардың тиімді орындалуын қамтамасыз етеміз», — деп түйіндеді Асқар Мамин.