Қазақстанда АХҚО базасында Инвестициялық резиденция бағдарламасын іске қосу жоспарлануда
2019 жылдың 30 желтоқсанында Елбасы «Қазақстан Республикасының кейбір конституциялық заңдарына өзгерістер мен толықтырулар енгізу туралы» Заңға қол қойды, оған сәйкес «Астана» Халықаралық қаржы орталығы туралы» заңға түзетулер енгізіледі.
Түзетулер «Астана» Халықаралық қаржы орталығы базасында инвестициялық салық резиденттігі бағдарламасын іске қосу мақсатында енгізіледі. Айта кететін жағдай, елге инвестиция тартуға тырысатын көптеген елдер осындай заң жобаларын қабылдайды.
Бағдарламаның мақсаты - инвесторларға және олардың отбасы мүшелеріне 5 жылға дейінгі мерзімге Қазақстан Республикасына кіру визаларын алу құқығының орнына инвестициялар тарту, сондай-ақ мемлекеттік бюджетке міндетті төлем төленген жағдайда, Қазақстан Республикасының шегінен тыс көздерден кірістер бойынша ЖТС төлеуден босату.
Бұл жерде мынадай аспектілерге назар аударған жөн:
Біріншіден, әлеуетті шетелдік инвестор (жеке тұлға) АХҚО офисында Қазақстан Республикасының заңнамасында белгіленген талаптарға сәйкестігі және сенімділігі үшін тексеруден өтуі керек. Талаптарға сәйкес, әлеуетті инвестор алдыңғы 20 жыл ішінде Қазақстан Республикасының азаматы болмауы керек және салық салу мақсатында алғашқы өтініш бергенге дейінгі 20 жыл ішінде Қазақстан Республикасының резиденті болмауы тиіс.
Екіншіден, тексеруден өткеннен кейін, әлеуетті шетелдік инвестор АХҚО биржасында, АХҚО инвестициялық қорларында, АХҚО қатысушыларының жарғылық капиталдарында бағалы қағаздарға инвестициялар жұмсайды (мөлшері Инвестициялық резиденттік бағдарламасымен белгіленеді) және АХҚО инвестициялық резиденті атанады.
АХҚО инвестициялық резиденті АХҚО өтініші бойынша 5 жылға дейінгі мерзімге кіру визасын алуға құқылы. Виза беру немесе беруден бас тарту туралы шешімді уәкілетті орган заңнамада белгіленген тәртіппен қабылдайды.
Қазақстанда болғанына 90 күн өткеннен кейін, АХҚО инвестициясының резиденті Қазақстан Республикасынан шегінен тыс көздерден түсетін кірістер бойынша ЖТС төлеуден босатылуға құқылы. Ол үшін ол мемлекеттік бюджетке міндетті төлемді төлеп, салық органдарына жүгінуі қажет (мөлшері Салық кодексінде белгіленген).
Бұл жағдайда Қазақстан Республикасының аумағында табылған кірістерге Салық кодексіне сәйкес салық салынатын болады, ал шетелде табылған табыстарға салық салынбайды. Бұл шара өздерінің салық шығындарын оңтайландыруға ұмтылған инвесторларға бағытталған.